د صحیح البخاري په شرحه فتح الباري کې "د هغه چا په اړه چې ولاړ دی او له ناست عالم څخه پوښتنه کوي"په باب کې راغلي دي.

عن أبي موسى قال: جاء رجل إلى النبي صلى الله عليه وسلم فقال: يا رسول الله ما القتال في سبيل الله؟ فإن أحدنا يقاتل غضبا ويقاتل حمية فرفع إليه رأسه قال وما رفع إليه رأسه إلا أنه كان قائما فقال: "من قاتل لتكون كلمة الله هي العليا فهو في سبيل الله عز وجل".

ژباړه: له ابو موسی رضي الله عنه څخه روایت دی چې وایي: رسول الله صلی الله علیه وسلم ته یو کس راغی او ویې ویل: اې رسول الله! في سبیل الله قتال څه شی دی؟ ځکه په موږ کې یو د قهر او غوسې له مخې او بل د تعصب له مخې قتال کوي. دا چې ناست و، نو خپل سر یې راپورته کړ، سر يې ځکه پورته کړ چې هغه سړی ولاړ و او ورته ویې فرمایل: څوک چې یوازې په دې موخه قتال وکړي، ترڅو د الله تعالی کلمه لوړه شي، نو د دغه کس قتال في سبیل الله دی.

اسلام د عملونو په ترسره کولو کې نیت ته پام کړی دی او دا حدیث ښايي د امت لپاره په دې برخه کې یو څرګند پیغام وي، چې په هر حالت او شرایطو کې په ځانګړې توګه له دوښمن سره د مخامخ کېدو پرمهال باید له الله سبحانه وتعالی سره خپله اړیکه وساتي؛ ځکه په داسې یو خطرناک حالت کې د هر شي په پرتله یوازې له الله سبحانه وتعالی سره اړیکې ته ډېره اړتیا ده او دا حالت له الله سبحانه وتعالی سره له اخلاص پرته نه راځي، چې امت د اسلامي بیرغ د پورته کولو لپاره قتال وکړي، ترڅو د الله سبحانه وتعالی کلمه لوړه شي.

اې مسلمانانو:

نن ورځ د امت د هغو ډلو حالت څه ډول دی، چې خپل تعادل نه لري؟ بلکې خپل عقل یې له لاسه ورکړی، راوځي او جنګېږي ترڅو د امریکا کلمه لوړه شي؟! ترڅو د اسلامي خاورو د غلامو او مزدورو حکامو کلمه لوړه شي؟! د دغو ډلو حالت څه دی چې یوازې د امت له بچیانو سره جنګېږي؟! ایا رسول الله صلی الله علیه وسلم تاسو ته همدا امر کړی دی؟! ایا د سایکس پیکو تر بیرغونو لاندې جنګېږئ؟! ایا دا همغه قتال دی چې الله سبحانه وتعالی له تاسو څخه غوښتی دی؟! په الله قسم، چې نه. دا هغه څه نه دي چې الله سبحانه وتعالی او د هغه رسول صلی الله علیه وسلم غوښتي دي؛ بلکې الله سبحانه وتعالی غواړي چې د هغه سبحانه وتعالی د رضا لپاره او في سبیل الله قتال وکړئ، الله سبحانه وتعالی غواړي چې د هغه سبحانه وتعالی د کلمې د لوړېدو لپاره قتال وکړئ، ترڅو مسلمانان د خلافت په تاسیس سره چې الله سبحانه وتعالی یې ژمنه کړې، یو ځل بیا خپل پخواني شان و شوکت ته ورسېږي.

اې ربه! موږ ته د نبوت پر منهج راشده خلافت ژر راکړه، ترڅو مسلمانان متحد کړي او ستونزې او غمونه یې ورڅخه لرې کړي او اې ربه! ځمکه د خپل کریم ذات په نور سره روښانه کړه. آمین آمین. 

لیکوال: ابو مریم

ژباړه: صهیب منصور