اې د قدرت څښتنانو! له دې بې رحمه او ظالمو واکمنانو څخه لاس واخلئ او پر ځای یې بیا خلافت تاسیس کړئ

د پاکستان یو پر درېیمه برخه ځمکه سېلابونو لاندې کړه. تر ۱۵۰۰ ډېرو کسانو خپل ژوند له لاسه ورکړ. یو میلیون کورونه ړنګ شول. دغو سېلابونو ۳۵ ميلیونه خلک، چې ۱۶ میلیونه یې ماشومان وو، زیانمن کړل. خو د پاکستان د ډيموکراټيکې رهبرۍ لپاره مرګ او ویجاړي یوازې د عکس اخیستلو یو فرصت و؛ ځانونه یې لانده کړل او خلکو ته یې یو څه خوراکي توکي ووېشل. د بې ځایه شویو او بې وزلو کسانو د هوایي سروې په کولو یې له خلکو سره خواخوږي وښوده او داسې یې وګڼله چې ګواکي خپل مسوولیت یې ادا کړ.

سیاسي رهبري د دې پرځای چې له سېلاب ځپلو سره پوره مرسته وکړي؛ د پوځ د نوي مشر پر انتصاب او ټاکنیزو لوبو بوخته ده او پوځي رهبري یې هم د راتلونکي مشر پر سر په مبارزه لګیا ده. لومړی وزیر شهباز شریف د ملکې الیزابت د جنازې د مراسمو لپاره لندن ته لاړ؛ فکر کوي چې که دی نه وي، جنازه نه کېږي. په همدې توګه، PTI مخالف ګوند په لاریونونو، تبلیغاتي غونډو، پر ټولنیزو رسنیو په کمپاینونو او د دروازو تر شا پر پټو ناستو بوخت دی. د پنجاب او خیبر پښتونخوا ایالتي دولتونه په خپلو سیاسي او شخصي ګټو پسې دي. دا ټول په داسې حال کې ده چې سېلاب ځپلي تر شنه اسمان لاندې د خوړو او لومړنیو اړتیاوو لپاره ژاړي او چغې وهي. دوی له ککړو اوبو څخه د پیدا شویو ساري ناروغیو؛ لکه کولرا، ډينګی او ملاریا پر وړاندې د مبارزې وس نه لري.

د اټکل له مخې، د سېلابونو له امله د اوښتو زيانونه کچه تر دېرش ملياردو ډالرو زیاته ده. ولاړ فصلونه له منځه ولاړل. په میلیونونو څاروي د سېلاب له امله زیانمن شوي. په داسې سخت حالت کې باید ټوله دولتي دستګاه، واکمنان، بیروکراسي، پوځ، پولیس، مدني مدافعین، وزیران، د خلکو استازي، دولتي او روغتیايي کارکوونکي او ... بسیج شي؛ خو دلته داسې څه نه دي تر سترګو شوي. حکومت یې د غلې دانې ذخیره خلاصه نه کړه. د دغې ذخیرې خوله د خلکو لپاره نه، بلکې یوازې د سود د ورکړې لپاره خلاصیږي. دلته د حکامو لومړیتوب له خپلو خلکو سره په درد کې شریکېدل نه، بلکې د استعمارګرې بریتانیې د ملکې په مړینه ماتم کول دي.

راشده خلافت ښودلې چې څنګه د قحطۍ او سېلابونو په شان افتونو سره مقابله وکړي. کله چې په ۱۸مه هجري پېړۍ کې په حجاز کې قحطي راغله، ټوله دولتي دستګاه د ناورین د کمولو لپاره بسیج شوه او ټوله رهبري په بشپړه توګه د مرستې رسولو په برخه کې بوخته وه. له مصر او شام ولایتونو څخه د خوراکي توکو او جامو په ګډون پام وړ مرستې ولیږل شوي. خلیفه عمر رضی الله تعالی عنه پخپله په مرسته رسولو کې بوخت و. دا د طبیعي ناورین په ځواب کې د خلافت د پام وړ او د امت پراخ غبرګون و چې له ډیموکراسۍ سره بشپړ توپیر لري. شهباز شریف د نړۍ د تودوخې په اړه څېړنې بیانوي چې په دې پلمه خیرات راټول کړي.

د دغو سېلابونو پر مهال دومره غفلت دا په ډاګه کړه چې اوس د سیکولر ډیموکراسۍ د ښخولو وخت دی. له همدې واکمنانو یوه یې هم تر سېلابونو وړاندې د مسوولیت احساس نه درلود، نو اوس او په راتلونکي کې به یې څه ولري؟ اوس هغه وخت را رسېدلی چې دوی نسکور شي، لرې شي او بېرته خلافت تاسیس شي.

اې د پاکستان د وسله والو ځواکونو افسرانو! د بسیج کېدو لپاره نور کوم دلیل غواړئ؟ په سند او بلوچستان کې د دولتي دستګاه غفلت ښکاره دی. واکمن ګوند او اپوزیسیون د پنجاب صوبې پر سر د واک په جنجال کې ښکېل دي، په داسې حال کې چې د سند او بلوچستان رایې په دغه جنجال کې نه شمېرل کېږي. د ملیونونو خلکو ژوند او راتلونکی ستاسو په پرېکړه، دریځ او عمل پورې تړلی دی. همدا اوس د خلافت د بیا تاسیس لپاره نصرت ورکړئ او خپل ولس له دغه ظالم نظام او بې پروا حکامو خلاص کړئ. الله سبحانه وتعالی فرمايي:

 (يَا أَيُّهَا الَّذِينَ آمَنُوا كُونُوا أَنْصَارَ اللَّه...)

ژباړه: «اې مومنانو! د الله تعالی انصار شئ...» [صف: ۱۴]

د حزب التحریرـ ولایه پاکستان مطبوعاتي دفتر